ഒത്തുചേർന്നത് പാലാ രൂപതക്കാരായ 4,000 ത്തിൽപരം വൈദികരും കന്യാസ്ത്രീകളും

പ്രവിത്താനം : പ്രവിത്താനം സെന്റ് അഗസ്റ്റിൻ ഫൊറോന ദേവാലയാങ്കണത്തെ വിശ്വാസ സാഗരമാക്കി  പാലാ രൂപതാ മിഷനറി സംഗമം. ബിഷപ് മാർ ജോസഫ് കല്ലറങ്ങാട്ടിന്റെ നേതൃത്വത്തിൽ നടന്ന മിഷനറി സംഗമം പ്ലാറ്റിനം ജൂബിലി ആഘോഷിക്കുന്ന രൂപതയുടെ ചരിത്രത്തിൽ പുതിയ അധ്യായം രചിക്കുന്നതായി. ലോകത്തിന്റെ വിവിധ ഭാഗങ്ങളിൽ സേവനം ചെയ്യുന്ന പാലാ രൂപതക്കാരായ 4000ലേറെ വൈദികരും കന്യാസ്ത്രീകളുമാണ് സംഗമത്തിൽ പങ്കെടുത്തത്.

ലോകത്തിന് ഏറ്റവും അധികം മിഷനറിമാരെ നൽകിയത് പാലാ രൂപതയാണെന്ന് ചടങ്ങ് ഉദ്ഘാടനം ചെയ്ത കേന്ദ്ര മന്ത്രി ജോർജ് കുര്യൻ പറഞ്ഞു.മിഷനറിമാരുടെ വിളനിലമാണ് പാലാ രൂപതയെന്ന് അധ്യക്ഷത വഹിച്ച സിബിസിഐ പ്രസിഡന്റും തൃശൂർ അതിരൂപതാധ്യക്ഷനുമായ മാർ ആൻഡ്രൂസ് താഴത്ത് അഭിപ്രായപ്പെട്ടു.39 ബിഷപ്പുമാരെയും പതിനായിരത്തിലേറെ മിഷനറിമാരെയും സഭയ്ക്ക് സംഭാവന ചെയ്ത പാലാ രൂപത മിഷൻ ഹോം ആണെന്ന് ബിഷപ് മാർ ജോസഫ് കല്ലറങ്ങാട്ട് പറഞ്ഞു. പാലായുടെ സൗന്ദര്യം അതിന്റെ മിഷനറി ചൈതന്യമാണെന്നും വിശ്വാസക്കോട്ടയുടെ സംരക്ഷണം തീർത്തവരുടെ സംഗമമാണിതെന്നും മന്ത്രി റോഷി അഗസ്റ്റിൻ അഭിപ്രായപ്പെട്ടു.

മാർ ജോസഫ് ചരണകുന്നേൽ, മാർ പീറ്റർ കൊച്ചുപുരയ്ക്കൽ, മാർ ജേക്കബ് അങ്ങാടിയത്ത്, മാർ സെബാസ്റ്റ്യൻ വടക്കേൽ, മാർ കുര്യൻ വലിയകണ്ടത്തിൽ,വിൻസന്റ്റ് മാർ പൗലോസ്, മാർ ജോർജ് രാജേന്ദ്രൻ, മാർ ജോസഫ് കൊല്ലംപറമ്പിൽ, മാർ ജോസ ഫ് സ്രാമ്പിക്കൽ, മാർ ജോൺ നെല്ലിക്കുന്നേൽ, മാർ മാത്യു നെല്ലിക്കുന്നേൽ, മാർ ജോസഫ് കൊല്ലംപറമ്പിൽ CMI, വർഗീസ് ജോർജ് മാളിയേക്കൽ, എംപിമാരായ ജോസ് കെ.മാണി, ഫ്രാൻസിസ് ജോർജ്, ആന്റോ ആന്റണി, ഡീൻ കുര്യാക്കോസ്, മാണി സി. കാപ്പൻ എംഎൽഎ, രൂപത വികാരി ജനറൽ മോൺ.ജോസഫ് കണിയോടിക്കൽ, പ്രവിത്താനം ഫൊറോന പള്ളി വികാരി ഫാ. ജോർജ് വേളൂപ്പറമ്പിൽ എന്നിവർ പ്രസംഗിച്ചു.

ഫാ.ഡോ.ടോം ഓലിക്കരോട്ട്, ഫാ.ജോസഫ് ചെരിയമ്പനാട്ട്, സിസ്‌റ്റർ സലോമി മൂക്കൻതോട്ടം എന്നിവർ മിഷൻ അനുഭവങ്ങൾ പങ്കുവച്ചു. 14 മെത്രാന്മാർ ചേർന്ന് അർപ്പിച്ച കുർബാനയോടെയാണ് സംഗമം തുടങ്ങിയത്.

വീഡിയോ കാണാം